1_ أبوي
--------
صباح أبواتنا ياالحبان
أبوي كدح السنين الغر
أبوي ضواق حناضل المر
أبوي وكتين مراحو يدر
يفرهد وفوق بيوتنا يشر
يبين وسط الليالى بدر
وفى ساعة القواسى جمر
عزيز .. ما وطا راسو فقر
وﻻ الغنى كان بزيدو بطر
كان تربال جروف وتمر
وكان دراج رعيتو عصر
كان دياشى عيشتو صبر
وابوي ماكان بنوم يشخر
أبوي سوه الوﻻب يخطر
ومانقص كتابو سطر
بنالو من المعانى قصر
وفوق الهم بقالنا جسر
*********************
2 _ أوتار طمبورنا
-------------
أوتارنا الحنينى الخمسي
ضهبان السنين دللنو
والحرف العطيش الظامي
بى ريق الحنان بلنو
المشتاق حزين الغربة
فى المرسى البعيد طلنو
والقول الغلبنا نقولو
نابن عننا وقالنو
¤¤
عزنا فى طنابيرنا ..الحانا وتعابيرنا
وامجاد المراكبية
النخلات تصافيهن والنسمات توافيهن
بالصفا والاريحية
ياهن حن رواوسينا
وهن مشرع أحاسيسنا
والراوانا حنية
¤¤
وسلكاياتنا ما بتون
وشوفوهن لطاف كيفن
واحدي ترن
وواحدي تئن
وواحدي تصن
وواحدي تسوي نغم
وواحدي من العلينا تجن
وهن سر الأمان والبوح
وماب نعرف بلاهن هن
******************
3 _سحلية فى دارالرياضة_الحلقة
----------------------
قالت ليا ..طيب
مالك انت واقف؟
قتلها داير أشوف
عشان كدى عاد بشاااارف
قالت ليا ..قنب وقرب وأبقه عارف
هنا الشايف وحاتك
زي الماهو شايف
وهاك منى الحقيقة واسمع ولاتبالى
من تبيت وقمت حالى أنا ياهو حالي
بينات الشقايا والطير والسحالى
بلقه القاسمو الله فى القش والعوالي
مسالمة وسالمة يابه
والحن من خصالى
وريد خلق الله لينا
خله جنسنا غالى
عايشة على المحبة ومابتعب كتير
وكان بالغت فته بس حدى الحفير
طول اليوم أغنى معا لحن الخرير
وأنوم بين الازاهر والقش النضير
أعاين لي (موحمد) يقاوم فى الهجير بى طوريتو يكدح مرتاااح الضمير
يفتح فى الجداول شان يسقى الخدير
ويروى يباب حياتو بى عرقو الغزير
الايام تمر والحال جد فى جد
وبينى وبينو إلفة لاغل لاحسد
وعايشين فى حنان الام والولد
وفى يوم مانى خابرا ويبقالى الاحد
جوهو أولاد عمو زايرين البلد
**********************
4 _حكايات سودانيه
-------------
فى يوم من الاحلام
والدنيا كانت نو
والناس ورا الايام
تغزل خيوط الضو
كان العشم واقف
تحت المطيرة الشو
و الحلة .. محنانة
ما عارفا شن بتسو
***
كل الحكاوي هناك
كاسيها سمر الليل
أو لون بيوت الطين
الماب تخاف السيل
أو ضحكة الشقيان
وكتين يغلبو الشيل
حتى الغناوي هناك
دايرالا جمة حيل
**
روعة حكاياتنا
والقمرة يادوبا
مرسولة فى حجوات
شايلاها حبوبة
داساها فى روحها
وصاراها فى توبة
وداخراها للاجيال
باكر يغنو با
***
حاضرنا ما غايب
وأحلامنا ماغابت
والباكر المأمول
فى ضحكة إنسابت
قدامنا باقى طريق
والغيمة لوصابت
نملا البوادي غنا
وتبقه النفوس طابت
*****************
5 _ في زكرى رحيل الكروان يس عبدالعظيم
----------------------------
عينينا سالت أدمعن
كيفن دموعنا بنحبسن
مانحن ياالراحل المقيم
فى الدنيا لسة بنمتحن
ياحليل حليلو غنا الفريق
لمن يطوف فى حيهن
ويا حليل ربابتك فى العصير
واسلاكا ديمى ينوحن
تاري السواقى الكان زمان
تتباكى طول الليل تئن
عارفات فراقك للديار
وده الشي الحماهن يفرحن
نخل الغبش أهلى الحنان
ياغالى ليك دايما يحن
وفى الطين تحت من فوق يحت
دمعات سبيطو يشتتن
النيل همد حزنان عليك
رافض مراكبو يسيرن
ومن قيف حضن فى يوم خطاك
موجاتو قاسى بيرحلن
الإثنين سبتمبر 09, 2013 11:06 am