خالد شقوري في سطور وبعض قصائده

خالد عباس احمد علي شقوري ..

من مواليد كسلا - 1968 .. تربي وترعرع بها وتشرب حبها وحنين اهلها وارضها الطيبة ..
متزوج واب لــ طلال - نصر الدين - مروة - الفياض
عرف باسلوبه الخاص ونفسه الشعري المميز .. يمتاز شعره بدقة التصوير والبراعة والمفردة الخاصة ..
كتب في مجالات عديدة وله الكثير من الاعمال المغناه ..وتغني له عدد كبير من فناني الطنبور منهم كمثال - عثمان اليمني ود المساعيد - صديق احمد - عبد الرحيم البركل - الطيب وداعة عبد الرحيم ارقي - ياسر الحجير - هيثم قنتي - معتصم ابراهيم - حنان النيل - ميرغني النجار - معاوية المقل - جعفر المنصوري - عبد الرحمن الكرو -عمر النافعاب - قرشي الحجير - يعقوب تاج السر - الواعد جبريل شقوري - محمد النصري - طارق العوض -عبد العظيم منصور - خالد محجوب الصحافة - ثنائي العامراب - جعفر السقيد - ود المساعيد -ومن ساحة الوسط - حمد الريح عبد القادر سالم سد مروي -عادل مسلم وعصام محمد نور نهي عجاج - رفيعة ابراهيم - الجمري حامد - سبت عثمان - حامد كسلا ادروب - عاطف السماني وليد زاكي الدين نبوية الملاك - سمية حسن - اسرار بابكر - المطربة صباح - عوض كسلا - انصاف مدني الامين عبد الغفار ومجذوب اونسة علي اللحو عمر احساس عبير علي والخطيب - ورد العمر - - كما كتب العديد من المدائح النبوية قـدمتها المادحة فيحاء محمد علي واصوات اخرين لايسع المجال لذكرهم
عمل بالاعلام السوداني وقدم العديد من البرامج في الاذاعة والتلفزيون القومي واذعات ولائية مختلفة ..مثل نادي الطنبور - سهرة بلدنا - صباحك يابلد - الزول السمح الاذاعة القومية - طنبور ودليب بقناة هارموني - الشوق للبلد بقناة قوون - اشواق الطنابرة تلفزيون الولاية - اولاد بلد التلفزيون القومي - عشانك ياوطن و صفحات شعبية اذاعة كسلا - اجراس وانفاس بتلفزيون كسلا - رئيس تحرير مجلة اصداء الشرق كسلا - مقالات واعمدة بصحف مختلفة - ممثل السودان في الوفد الشبابي باسمرا واديس والقاهرة وسوريا - شارك في مهرجانات كبري باستادي المريخ والهلال وقاعة الصداقة - عضو لجنة تحكيم مهرجان الابداع العسكري ومهرجان الشباب - عضو لجنة تحكيم مهرجان الناشئة القومي عضو لجنة الخرطوم عاصمة الثقافة العربية 2005 م مشرف دائم بمهرجانات الدورة المدرسية القومية
الايام المفتوحة للاعياد والمناسبات 1990 - 2010 م - تسجيلا باذاعة عطبرة ودنقلا والقضارف ومدني
يمتاز خالد شقوري بخصوبة الخيال الشعري ويتجلي لنا ذلك من خلال عدد من القصائد مثل الوريقة ام مية وسحلية في استاذ الخرطوم وحكاية الحاجة مبروكة وتمرة في قلب الخرطوم وهي قصائد اخذت الطابع الحلمنتيشي الدرامي وذلك من خلال الحوار الهادف الذي نلحظه في كل قصيدة واذا اخذنا في ذلك مثالا قصيدة سحلية في استاد الخرطوم التي بين لنا خالد من خلالها الفرق الواضح مابين حياة ابن المدينة وابن الريف او القرية والاختلاف مابينهما في التفاصيل الحياتية اليومية والفهم العام لحياة كل منهما ..
ان تقديمي للاخ خالد شقوري يأتي من معايشتي الشخصية له كصديق قبل ان يكون كشاعر فقد جمعتني به تفاصيل ومواقف وايام توطدت علاقتنا معا ً .. ويمكن القول انني عايشت لحظات ميلاد عدد كبير من قصائده وعشت معه كل حروفه النابضة بالاحساس ..

لكم مودتي ..

1_ أنا يابلد
--------


.وكتين أغنيك يابلد
واملاك غرام
اعرف تماااام
[أعيد للوطن كلو وأهنى الراسى ]
[فى ضلو وحتى الفى المنافى بعيد ]
[ نسيم أشواقنا يوصلو ]

يا بلد جواي ممدد
فيض معزة وشوق حبايب
وناسو فى كل المداخل
عندي بالاحساس.. قرايب
أي زول ..لوكان عليا
بكرة يصبح خاطرو طايب
ياوطن ..خيرك..كفانا
والله يكفيك المصايب
¤¤@@¤¤
عزتك بالدنيا عندي
واغنياتك أمنياتنا
روعتك ختفة سمارك
وبهجتك حفت صفاتنا
وإنت مادام فينا حاضر
نحن حاضرين بى ثباتنا
ولما نتصفح كتابك
نلقه فيك قيمة حياتنا
@@¤¤@@
إسمك السودان بلدنا
يانغم فالنا وسعدنا
ووافى خير للقبلنا
ونحن والجايين بعدنا
سر سماحك فى البوادي
لما يتضاحك رعدنا
وفى الوداد المالي روحنا
حتى لو يوم إبتعدنا



2 _روعتك يا سودان

اعرف تمام
أنا ما ببيعك بالكلام
وأنا مابغنيك شان معارضة أو نظام

والله ياأروع بلد
ووالله يا مهد الكرام
كل الحروف
المني ليك
حب والتزام
واحلم دوام
انك تكون بين البلاد
عالى المقام
وانك تفيض
زي نيلك الدفاق ..وئام
والناس عموم
تبرى الغيوم
وتحدد الوجهه التمام



3 _لبينة الشاي
----------
خالد شقوري

وقفت بعد حلبت لبينة الشاي تكورك يا الحسن
يا ام الحسن وينو الحسن
لمن صفت رغوة شخيبات اللبن
في حلتا المبني من طبق السكن
واقفي في حوش البهايم ولسع تكورك يا الحسن
جاها حسا من بعيد مارق من القاطوع ورا
قال ليها خير يا الحاجي خير
قالتلو خير تعال لي جاي دايراك تعنون لي جواب
يا الراسي لي ولدي الخدير
لا تبقي زي شافع السرير يقول لي زين آيمة زين
وزين تبقي بعد شهير
وان جاني يكتب فد سطير
اقولو يا سجم السجم انا زي قرايتك ما قريت
لكن عويناتي بيفرزن الوريقة البيضاء من لون القلم
بعد المغيرب بي شوي جاها الحسن تعبان يسير
دا العشى غنمو من الدرب سرقت ندي وشو الهجير
سوتلو شايا بي لبن قرض معاهو حرف فطير
قالتلو بسم الله قول واكتب وصيتي انا للخدير
الزمن يا ولدي ماحقاهو السنين
البعيش في الدنيا ما بعيش مرتين
العمير فاضلي بس منو اليقين
وانت طول في البنادر يا الحبيب لا متين
تعال اوريك حق ابوك الجم حقيق حاج اللمين
ان عرفتو بلا عمار يقولو ولدا عندو طين
العلاج لا تنسي رسلو لي دحين
العوينات آجناي شوفن ضنين
سلامنا ليك مطرز للبنيات والبنين
ولو الارض يا ولدي تنشال في الايدين
انا كت برسلا ليكا في لوري الخزين .

4_ يا بنيه / خالد شقوري
----------------

شيلى باقى الحسرة منك
ونومى فى ضل الطواري
أزرعى الخير يابنية
وخدري البلد الصحاري
أنسى جوعك يوم رجوعك
وشتتى العيش للقماري
ولمى فى خاطرك نخيلك
والمناجل والعصاري

وفى قلوب الناس بدورك
تنسجى الأمل البداية
واحكى لي انا عن غرامك
وقصة الريد المعايا
لما كان الريح بيمسح
بالمساير دمعة جاية
والطريحة اللونها باهت
تحكى عن كيف النهاية

كلميهم يابنية
واحكى للناس الرواية
لما ناديتك.. تعاااالى
وقلتى لي جاياك برايا
لمن أهديتك صفايا
وروح تعلمك القراية
لمن أهديتك غناوي
ولوح ومحبره للدواية
لما شلت الآهة منك
والدميعات والمراية
وقلت ليك ياغالية صورتك
واضحة فى عينيا آية




5_(سحلية فى دارالرياضة_حلقة)
---------------------

وفى يوم مانى خابرا
ويبقالى الاحد
جوهو أولاد عمو
زايرين البلد
هدومن زي جليدى
عاد مشدودة شد
ولونن ..خلو ساااكت
سوالى العقد
كلامن زي سلامن
سلامن زي كلامن
تب ماليه حد
الزول تلقا يسأل
وماب يرجالو رد
ماهن زي محمد
بين وبينو سد
بس غايتو الرحم
حبلو حبل مسد

موحمد ساقو يومو
فى يابت ياولد
وأخيرا خله شغلو
واتمحن قعد
يعاين فى البططن
أخوان المهد
ومرة ومرة يضحك
فى عمو أب ذرد
وفى حالو الصبح
قريب من العمد

وسافر بى خيالو
وعقلو بعيييد شرد
وإتذكر أبوهو الحاج عبدالصمد
يوم ناداهو قاللو موحمد آآحمد
الواطة الشمس والكرو والكرد
إن فارقت ميسن يختاكا السعد

وتانى رجع خيالو
وشاف أولاد أعمو
يصورو فى الجناين
الراويها دمو
يدقس وتانى يصحى
وديك كل زول فى همو
فد حوضا فضللو
غلبو عديل يتمو
ورغم الحال قليبو
فرحان بى ملمو
ما أصلو المسيكين
أصلو وحيد عن أمو

6_ كون لي غيرك
-------------

ادي الناس
من خيرك كلو
وماتديهم فضلة خيرك*

واجمل حاجة
تشوف أفراحك
تزهر وتثمر فى عيون غيرك*

أبقى النخلة الوافى عطاها
أبقى الكلمة وأبقى غطاها
وابقى الزول الواضح سيرك

7 _هن . كمهن
----------
هن .. كمهن
لامن أخبيهن عليك
ماكلهن بيتين شعر
إتوشحن لحن الشعور
وإتقاودن فى السكة ليك
@
ياهن حديثك .. بس براااي
سويتلهن قافية ووزن
وحبستهن يومين معاي
شان بالمعانى اطرزن
ومرقتهن زي النسيم
شايلات مقاطع شوقى ليك
كيفن تقول
أنا داير أخبيهن عليك



8 _بدرك قسم
---------
والشوق نسم
والضو..
على صفحة جبين الله
رسم
لوحة لقاك
يوم جيتنا داك
عابق شذاك
والكون بسم
**
فوحنا بيك
وفرحنا بيك
وصدحنا ليك لحن الوصول
وسكتنا..
خلينا الطيور
تفصح عن اللحظات تقول
ماشفت كيف .. سرب الفراش
عاملو مسرح فى الحقول
حتى الغمامة
الجاية ضل
غنت حروف جيتك ..هطول

9_سفر الامل
----------

أخترت من دون العيون
ياغالية عينيك أعشقا
وإخترت شوفتك كل يوم
لو حتى شوفتك أسرقا
@@
والله يانور العيون
اصعب سفر سفر الامل
تلقاك تعاين للهدف
وماداري إنت متين تصل
كل الدروب جربتها
سافرت فيها عشان أصل
وفى كل مرة ألف واعود
من تانى لي نفس المحل
¤¤
عارف المواجع لي براااي
وأنا لي سنين ببكى وبنوح
وفقدت إحساس الالم
ياروحي من كتر الجروح
مابلقة .. عاااارف.. فرحتى
غير فيكى يا أم وجها صبوح
وكفاية كل القلتو ليك
أنا تانى مابقدر أبوح

10 _ الا نبينا
----------

(صلاة وسلام على خير الانام وخير من وطأ الثرى _اللهم صلي وسلم عليه)

شن فايدتنا عاد
لو مانصرنا نبينا
وشن فايدة حروفنا
ورصتا وتلحينا
المعنى الجميل
ما عندو يجينا
لوجانا لابس
بردة الهادينا
¤¤¤¤
كان للرحمة.. فاق
وابل السحب فى الجود
ويوم الزحمة ماب يقبل نكون واقود
الهادي
الضمين
الحامد
المحمود
وللقاصدنو
ياالقاصدنو
إن شاءالله السهم مردود .