وتر مشدود
سلمت
خايف كنت ما يسلم قلب مفصود
حلمت
قبلك كنت لا بحلم ولا موجود
معاك بحلم كأني على فرس طاير بغني على وتر مشدود
واطير عبر السما المدود
سما الوطن اللي مالو حدود
حمامة جناها لا خايف ولا مفقود
واشر الغيمة خيمة على النجم وارتاح
أصادف أجمل الغابات واصادق غصنك الفواح
واشرب من زوايا القلب جنبك اخر الأشباح
وتفتح كلمة من عينيك لي مجرى الغنى المسدود
واخط اسمك على باب الزمان اكليل
وردة صبية تلمع فوق صديري النيل
وباسمك أغني لي عالم بسيط وجميل
وانادي عليك ملاذا في شتا الأيام
وبردا في الحياة وسلام
وفي شدة هجير وزحام
جزيرة حنينة بين نهرين حنان القاك عليك اتلم
وهودج في صحاري الهم
وعالي النخيل عليك اتلم
وفي السكة اللي ما بتعود معاك
لآخر المشوار نغني على وتر مشدود
---------------------------------------
المستحيل
لو بإيدي ..
لو بإيدي كنت طوعت الليالي
لو بإيدي ..
لو بإيدي كنت زللت المحال
والأماني الدايرة في دنياي ماكانت محال
دي الإرادة ونحن ما بنقدر نجابه المستحيل
دي الإرادة والمقدر ما بنجيب ليه بديل
دي الإرادة أجبرتني في هواكم من قبيل
غصبا عني وغصبا عنك
انت حبيتني وهويتك
لو بإيدنا من زمان
كنت خليتني ونسيتك
والنهاية ..
انت عارف وانا عارف
لو بإيدي كان هديتك
أصلو حبي أقوى وأكبر من إرادتي
وانا حاسس في جحيم نارك سعادتي
والهيب البكوي في روحي
في ذاتي
هو إنت
قلبي دايرك
حبي عارفك
في شبابك في صباك
في جمالك في وفاك
في شبابك في وفاك
يا المسير وماك مخير
انت ياصابر عند الله جزاك
-------------------------------
أمير الحسن
من صحابك ومن قرايبك يا حبيبي بغير عليك
كل من قال يا حبيبي أفتكـرتو يشـير إلـيك
وأي عاشق لو تغنى قلت لازم شـاف عينيك
يا أمير
كنت تايه في بحور الشوق وأمواج الحنان
قبلك أنت وحبك أنت جابني لشاطئ الأمان
والمحبة يا حبيبي أقوى من قدر الزمان
يا أمير
يا أمير الحسن لو تسمح ظروفك
كل ساعة كل لحظة كل يوم مشتاق أشوفك
وين يا أمير
يحسدوني الناس في حبك كم عزول روج إشاعة
أنت يا رب المحاسن والبراءة والوداعة
في إشارة من عيونك قلبي قال سمعا وطاعة
يا أمير
يا أمير الحسن لو تسمح ظروفك
كل ساعة كل لحظة كل يوم مشتاق أشوفك
---------------------------------------
قطر الندى
الريـد جــوة قلـبـي بحـبك بدأ
يا طـيـبة حـياتي يا قطـر الندى
ما كـان في خـيالي تتنكـر كـدة
أيامـنا الجمــيلة لـيه بتنـكـدة
جربت هـواهم وقلـيـبي أنكـوى
تاريهم جـاروا ما صـانوا الهـوى
حاولت أسببك وأتنـاسى المــضى
أيامـك معــاي ساعـات الرضى
المكــتوب علي أنا قلـبي ارتضى
يا ريت الليالي عطـفه يعــوضي
الكلـمة الحنـينة مشـتاق اسـمعة
روحـي خلاص جفيتة الشوق لوعة
الدمـعات عـيونـي كيفن تمـنعة
وأنا شايف سنيني جـورك ضـيعة
يومي الشـفـتك أنت حسيت بالهنا
ضـويت لحـياتي شمــعاتي أنا
بعـد الحـب دة كلو يا اجمـل منا
ليه بكيتني تاني عاودت الضنا
جــربت هـواهم وقلـيبي أنكوى
تاريهم جـاروا ما صـانوا الهـوى
------------------------------
حنينة
ياما دربك كنت بفرشو ورد وحنية واماني
ياما عهدك صنتو وما خنت وكام ليك حناني
ياما من ليلي ونهاري ودمعي بنسج لك أغاني
وكل كلمة من غناي فيها من حبك معاني
إن نئيت برجاك
وان نسيت بطراك
وان قسيت بهواك
جيت اعاتبك واشتكيلك واشرح الحب من بدايتو
قلب خادع مافي رافع بس عليك تسمع حكايتو
انت حاكمو وانت مالكو وانت في ايدك وصايتو
انت لو حكمت قلبك ما اظن ترضى بنهايتو
العهود صونوها
اوعو لا تخونوها
دا حرام تنسوها
تبقى جنبي وننسى كل الدنيا نغرق في الأماني
واشتكيلك يا حبيبي منك انت ومن زماني
في غيابك ياما ليل الغربة بالآلام رماني
ابقى عيني وابقي روحي وابقي قلبي يا حناني
يا أمل يا لطفي يا حنية وينك من عيوني
لو تعود وتجيني
القى فيك حنيني
وانسى بيك انيني
ابتساماتك ربيع دنياي ياما عشت فيها
فتحت في دربي أشواق الليالي البشتهيها
دي السعادة المن زمان بسأل عليها
بكياني بشبابي بحياتي افتديها
الإله يرعانا
هدا الغرام ضمانا
ونحن ما أحلانا
لو بكاي هماك
لو شقاي هماك
ما كنت يوم
فارقتني
خاصمتني
عذبتني
---------------------
وسط الدايرة
وسط الدايرة أجمل نايرة
خلي قلوبنا تطير
وارحلي بينا فراشة حنينة
بين زينات وعبير
ولما الخصلة تدور طربانة
تبقي حرير في حرير
فرحي خلق الله واتّنّي ياشبه القمرة
وارقصي رشي عبيرك فينا وفتحي يا زهرة
أرقصي زيدي الساحة سماحة
نحن معاك نشيل
نغني غناوي ..نحكي حكاوي
لما ندوب في الليل
لا ترتاحي لا تريحينا
لسة الوقت طويل
عمرك كل فرح يا زينة
شيلي من الأفراح وادينا
راقصي البسمة راقصي النسمة
خلي الموجة تدور بينا
أوعي تهدي
كمان اتحدي
يلا جميلك تمي علينا علينا
-------------------------------
وطنا
وطنا البإسمك كتبنا ورطنا
أحبك ..
أحبك مكانك صميم الفؤاد
وباسمك اغنى..
تغنى السواقى
خيوط الطواقى
سلام التلاقى
ودموع الفراق
واحبك ملاذ
وناسك عزاز
أحبك حقيقه..
وأحبك مجاز
وأحبك بتضحك
وأحبك عبوس
بعزة جبالك ترك الشموس
وما بين ظلالك
افتش وأكوس
أفتش طفولتى وملامح صباى
بناتك عيونن صفاهن سماى
وهيبة رجالك بتسند قفاى
أحبك بتضحك
واحبك عبوس
صحى بتملا عينى..
وتشّرف غناى
بحضرة جلالك..
يطيب الجلوس
مهذب أمامك يكون الكلام
لأنك محنك
عميق الدروس
مجيد المهابة
مديد القوام
شبابك تشابك
شديد الزحام
أراهم وراهم غبار الحياه
مداين تعاين
كأمّ العروس
تهلل تكلل جبين الإمام
رزازاً يبلل أغانى الخليل
أصدق كلامك حقيقه وبخاف
أخاف الطريق اللى ما بودى ليك
وأعاف الصديق اللى ما بهم بيك
معاك انتظارى ولو بالكفاف
وعنك بعيداً أبيت الرحيل
وبيك اعتزاز الصباح الجميل
جميع الأغانى اتكالن عليك
جميع الأغانى اتكالن عليك
-----------------------------------
واسفاااااى
وا أسفاي ..
وحاتكم انتو وا أسفاي
إرادة المولى
رادتني وبقيت غناي
أسوي شنو مع المكتوب
أسوي شنو؟
براهو الواهب العطاي
منو ..
منو البدور يساهر الليل
ويسافر
فوق جناح الشوق
يكوس نجماً بعيد ضواي
منو ..
إذا وصفولو أرض الحور
تلاقي قوافلو طول الليل
تشق التيه
تجر النم
مع الحردلو في الدوباي
وا أسفاي
ببيع الدنيا
كل الدنيا وا أسفاي
عشان خاطر عيون حلوين
وا أسفاي
منابع الطيبة متجاورين
وا أسفاي
ومتسامحين في السمحين
واسافر فوق صُبي العين
معاك سلامة
يادنياي
بتمدد وبتوسد وسادة شوق
وبنوم مرتاح وخالي البال
واقالب تاني عهد صباي
عشان ما تبكي ببكي أنا
واحاكي الطرفة
في نص الخريف بكاي
حمولي تهد جبال الشيل
وفايت في العتامِ الليل
ومتوكل عليك يا الله
دافر الليل
بِريق البسمة إن لاح لي
بتتفتح مشاكل الريد
واحسك جوا ..
زغرد فيها صوت الناي
وا أسفاي
وحاتكم انتو وا أسفاي
أسفاي
إذا ماشفت ناس سمحين
يتاتو ..
زي قدلة جنا الوزين
يتاتو
تلاقي قليبي يرمح جاي
لما يتاتو
زي قدلة جنا الوزين
يتاتو
حليل الكان بهدي الغير
صبر محتار يكوس هداي
من ناس ديلا وا أسفاي
من زي ديلا وا أسفاي
إرادة المولي رادتني
وبقيت غناي
----------------------------
بعد ايه
اسماعيل حسن
بعـد ايـه جيـت تصـالحـنى
بعد ما ودرت قلـبى الكنت فيه
جيت تشكى جيـت تحكي
جيـت تحكـي ليه
اعتذارك ما بيفيدك
ودموعك ما بتعيدك
العملتو كان بإيدك
انا مالى ذنب فيه
ليه جيت تبكى ليه جيت تشكى
انا خلدتـك بشعـري فى زمانك
ويامـا غنيـت وكان كلـو عشانك
وكان جزاي منـك صـدودك وهوانك
انا استاهل
انا استاهل وضعتك فى مكان مـا مكانك
روح الٌقـدر بى نفسـو ما بقسـو عليك
جيت تايب يا حليلك والفؤاد ملكوه غيرك
ربى يعدل ليك سبيلك كل
مناى فى الكون عديلك
ونهاية الخير نصيبك
ليه
ضيعوك
ودروك
انت ما بتعرف
صليحك من عدوك
استغلو الطيبة فى قلبك
وبى اسم العواطف خدعوك
حتى من كلمة حنانم وودادم حرموك
الله يا خد ليك حقوقك ويجازي الظلموك
----------------------------
الحزن القديم
ولا الحزن القديم
إنتِ
ولا لون الفرح
إنتِ
ولا الشوق المشيتْ بيهو
وغلبْنى أقيف
وما بِنْتِ
ولا التذكار ولا كُنْتِ
بتطْلَعِى إنتِ من غابات
ومن وديان...
ومنى أنا..
ومِن صحْيَة جروف النيل
مع الموجَهْ الصباحيَّه
ومن شهقَة زهور عطشانَهْ
فوق أحزانهْا
متْكَّيهْ
بتَطْلَعى إنتِ من صوت طِفلَهْ
وسط اللمَّهْ منْسيَّهْ
تَجينى
معاكْ يجينى زمن
أمتِّع نفسى بالدهشَهْ
طبول بتْدُق
وساحات لى فرح نَوّر
وجمّل للحُزن..ممْشى
وتمشي معاي
خُطانا الإلفَهْ والوحشَهْ
وتمشى معاي... وتْرُوحى
وتمشى معاي وسط روحى
ولا البلْقاهو بِعْرِفنى
ولا بعرِف معاكْ ..روحى
--------------------------------
نور العين
للشاعر اسماعيل حسن
قلبي الحابيك ما خان لياليك
ما ناسيك الماضي ماتقول ناسي
ما بدل حبو ابدا ماتنكر ليك
لكن الأشواك والنار حواليك
يانور العين
يانور العين انت وينك وين
في اللون الأسمر ذوبت شبابي
وعشقت الجنة وفي الجنة عذابي
صابر وبتألم والمر دا شرابي
ياحليل الراحو ياحليل احبابي
يا نور العين
يا نور العين انت وينك وين
الشعر الناعم بي عطرو اسرني
والوجه الناير بي نورو غمرني
عيونو النعسانة برموش تجرحني
خلتني متيم وين راحت مني
يا نور العين
يا نور العين انت وينك وين
انا والأنغام والعود في ايدي
بحكيلو حكايتي ويعيد ترديدي
واشكيلو همسة أو عذب نشيدي
ياما الأوتار تفضحني من ريدي
يا نور العين
يا نور العين انت وينك وين
--------------------------------------------------------------------------------
ود
/عمر الطيب الدوش
أعيشهْا معاكَ لو تعْرف
دموع البهجَهْ والأفراح
أعيشهْا معاكَ واتأسّف
على الماضى اللّى ولَّىَ وراح
على الفُرْقَهْ الزمان طويل
على الصبر الّى عِشْنَاهو
مع طُول الألم والليل
زمان كُنّا بنَشيل الوُّد
ونَدِّى الوُّد
وفى عينينا كان يكْبَر
حناناً زاد
وفات الحدَ
زمان ما عِشْنَا فى غُرْبَهْ
ولا قاسينا نِتْوحّد
وهسَّع
رُحْنا نتْوجّع
نعيش بالحسرَهْ نتأسّف
على الماضى اللِّي ما بِرْجَع
أحبَّك
لا الزمن حوّلْنى عن حُبّك
ولا الحسرَهْ
وخوفى عليكَ يمْنَعْنى
وطول الإلفَهْ والعُشْرَهْ
وشوقى الليك من طوَّل
لسّه معاي
ولى بُكْرَهْ
--------------------------------------------------------------------------------
أول غرام
اسماعيل حسن
أول غرام
يا أجمل هدية
يا أنبل مودة
يا نور عينية
حبي ما هديتو
وغيرك ماصطفيتو
واجمل من عيونك في الكون ما رأيتو
لونك أبهى لون
وكفاك العيون
آه للإبتسامة
كالنغم الحنون
نظراتك لهيب
وتثير الشجون
ليه قلبي سليتو
وبالآم رميتو
قول لي يا شرور ايه ذنبي الجنيتو
نسيت ضو القمر
في أجمل ليالي
وشعاع النجوم
يبهر كاللآلي
كيف تنسى النسايم
وانا حبي المثالي
قول ليه نسيتو
مع إنك رويتو
جورك يا ظلوم لله اشتكيتو
انا ما زلت هايم
اذكر طيف جمالك
اواصل الليل نهار
اسبح بخصالك
وماضي الذكرى عاد
يسجد لدلالك
تعال يا من هويتو
وشوف حالي الأذيتو
رفقا بدمعي والحب البنيتو
--------------------------------------------------------------------------------
صدفة
اسماعيل حسن
صدفة وأجمل صدفة انا يوم لاقيتا
أسعد يوم يومي الحييتا
نور عينية ياما حبيتا
النظرات بريئة وممزوجة بخجل
البسمات تضوي زي نور الأمل
وجهك بين مسايرك زي بدر اكتمل
والشامة في خديدك زي طعم القبل
تسكر قلبي وتشعل حبي يشهد ربي انا بهواك
ما قادر اقولك عن حبي الكبير
وصفو علي قاسي وعايش في الضمير
قدر الكون دا كلو حبي واكبر بي كتير
مالكني محيرني شوف قلبي الأسير
اسألي قلبك يمكن يقدر يشرح حبي أنا محتار
صدفة عيوني شافت ليلي الباكي نور
يا أيام ربيعي عمري معاكي أزهر
فيها الطير يغني ومن الحاني يسكر
عمري فراشة حولك وانت شبابك أخضر
ياما بحبك وبعبد حبك علشان حبك روحي فداك
--------------------------------------------------------------------------------
عذبني
محمد يوسف موسى
عذبني وزيد عذابك
يمكن قلبي يقسى
وزي مانساني قلبك
يمكن قلبي ينسى
يازين
عذبني وتفنن
في ألوان عذابي
ما تمسح دموعي
ما ترحم شبابي
خليني في شجوني
يمكن قلبي يقسى
وزي مانساني قلبك
يمكن قلبي يقسى
يازين
عذبني وتناسى
الكان بيني بينك
ما تطرا العشرة
والفات من سنيني
خليني في شجوني
يمكن قلبي يقسى
وزي مانساني قلبك
يمكن قلبي يقسى
يازين
عذبني وتنكر
للحب والحنان
للريد والمودة
وكل الكان زمان
خليني في شجوني
يمكن قلبي يقسى
وزي مانساني قلبك
يمكن قلبي يقسى
يازين
--------------------------------------------------------------------------------
سليم الذوق/ابراهيم الرشيد
يا سليم الذوق لو تعرف الشوق
ابقى انزل يوم من علاك الفوق
شوف عمايل الحب في الحشا المحروق
انا كالأنسام لم تهدا تروق
وان كالأضواء بعد كل شروق
لو بتذكرنا كنا نحنا ندوق
للسعادة طعم في رضا المعشوق
انحنا حلفناك بالغرام والريد
بي صفا الأحلام في عيون الغيد
وبالقليب الضاق لذة التسهيد
ابقى زاورنا حتى يوم العيد
ياأمل بسام دابو هال جديد
تخلي شوقنا الضال في ثواني يزيد
بعتاب صامت يشبه التغريد
نبقى نار في نارو لي لهيبا نزيد
--------------------------------------------------------------------------------
سوات العاصفة/محمد أبو قطاطي
سوات العاصفة بي
ساق الشتيل الني
وفعل السيل وقت يتحدر
يكسح ما يفضل شي
دا كان حبك وقت حسيتو
شفت الدنيا دارت بي
وقت شفتك ..
شعرت الرعشة من صوف راسي
لي كرعي
ومن الساعة ديك ياالسمحة
ولع فيني جمر الغي
كتمت الريدة ما شافوها
ناس الحي
وقلت الجنة عاد انشاالله
ما يقسن دروبها علي
ونجم الليل
منو العداهو غيري
وزاد حسابو شوي
وسافر بي خيالو هناك
صنقر فوق سحاب الري
بنيت في الموج قصور آمال
ومديت للرهاب إيدي
وشديت سرجي فوق الريح
عشان ألقاك
بدور أطوي المسافات طي
صعيب وصفك
لأنك هالة كلك ضي
وفوقك هيبة واجمل خامة
واسمح زي
جمالك في البنات معدوم
شبيهك ما كحل عيني
أقدلي ..
وسكتي الخشامة
وانزلي في العواذل كي
-----------------------
ذات الشامة/اسماعيل حسن
وحياة الأحلام القلبي سقاها ا
وحياة أجمل بسمة عرف معناها
وحياة سمر اللون وحاة محياها
وحياتك
وحياتي عندك
وحياة حبي
النهار صدك
وحياة أول نظرة لمحتك بيها
وحياة أجمل صدفة عرفتك فيها
وحياة الآمال العشت حياتي عليها
وحياتك
وحياتي عندك
وحياة حبي
النهار صدك
وحياة الأيام الجايرة وظالمة
وحياة حبي الكاتمو براك العالمة
أملي وكل منايا هناك يا حالمة
وحياتك
وحياتي عندك
وحياة حبي
النهار صدك
وحياة لونك انتي وحاة السمرة
وحاة حبي اليك من أول نظرة
وحياة طهر غرامي انتي القمرة
وحياتك
وحياتي عندك
وحياة حبي
النهار صدك
وحياة صمتك انتي وحاة الشامة
الشامة الفوق خدك نايمة دليل وعلامة
تزيد حسنك بهجة تزيدو وسامة
وحياة أجمل ريد في الكون يا حمامة
وحياتك
وحياتي عندك
وحياة حبي
النهار صدك
--------------------------------------------------------------------------------
خاف من الله/اسماعيل حسن
خاف من الله على قلبي
من غرامك خاف
زرعت الشوك على دربو
وياما في هواكم شاف قلبي
سنين وايام
قضيت عمري في لوعة
انادي الليل واقول ياليل
انا المظلوم عساي دمعة
دموعي تسيل وليلي طويل
وعايش في مهب الريح براي شمعة
انادي الليل واقول ياليل
ياما في هواكم شاف قلبي
خسارة قلبي في حبك واخسارة
علمتو يحبك
ولما سار في دربك
رحت وسبت حبيبك ليه
يا خسارة املي واملك وا خسارة
كنا بنبني الجنة
ولما خلاص قربنا
رحت هدمت سعادتك ليه
يا خسارة دمعي ودمعك وا خسارة
ياما سهرنا ليالي
ياحليلك يا غالي
وياما في هواكم شاف قلبي
يا قلبي انسى الفات وعيش من تاني وحداني
ولو حنيت لعهد الشوق اجيب من وين عمر تاني
كفى يا قلبي شفت الويل وليل السهد بكاني
بعد ما تبت من النار حرام تتجدد احزاني
يضمك ليل ويطويك ليل ونار الويل ميهادة
يا مظلوم وما ظالم حليلك والعمر فاني
وياما في هواكم شاف قلبي
--------------------------------------------------------------------------------
حسن عبد الوهاب : ماتخجلى
صبرت ..
واستنيت كتير اتمنى
أمني نفسي واقول
بكرة الجنة ..
ومن بعيد ياما
من جوا قلب بدعيلك معاي
نتهنى ..
عطشتي قلبي
وكل يوم تتجملي
أديني كلمة وسامحيني
وطَوّلي
ما تخجلي ..
يالسمحة قولي ..
استعجلي ..
خلاص كبرت وليك 19سنة
عمر الزهور
عمر الغرام
عمر المنى
اتمنى يوم تجمعنا
جنات حبنا
تبقي الأميرة والبطيع قلبي أنا
ماتقولي لي
مالي ومال الحب أنا
نار الهوى الوقادة
والشوق والضنا
وحلاوة الأحلام
وآمال الهنا
إيه يجمعن غير ال 19 سنة
--------------------------------------------------------------------------------
حبيناك من قلوبنا/اسماعيل حسن
حبيناك من قلوبنا واخترناك يا حلو
ماتبادلونا العواطف ليه تدللو
حبينا فيك العفة والدم الشربات
والله العيون خلتنا في حيرة وآهات
وفي ابتسامتك شفنا جنات وجنات
شوف العلينا واحكم كن داير اثبات
كان الدلال من طبعك وعاجبنا فيك غرور
ان جرت برضك عادل ظلم الجميل مغفور
نهواك نفيك في ريدك شايفين ألمنا سرور
نار الغرام تهاجر لقلوبنا توقد نور
أصلو الجحيم في غرامك نرضا عشان يرضيك
حتى المحال ان درت بنطوعو ونهديك
ارواحنا حولك هايمة حارساك دوام تحميك
بيك نورت أيامن والفرحة تمت بيك
---------------------------------
حاير في أمري معاك/عبدالرحمن الريح
حاير في امري معاك
لاقدرت القي وفاك
ولا قادر انسي هواك
حاير في امري معاك وعيوني حيرانا
في امري والانجم من سهدي غيرانا
الغمده تهجرني والليل يسامرني
تحمل نسيم شذاك ياروحي ما احلاك
في مشيتك محتار
ماقدرت اعرف كيف
ياناير الوجنات
جسمك رشيق وخفيف
نتلاقي في الخطوات
وتقسم البسمات
تحمل نسيم شذاك
ياروحي ما احلاك
حاير في امري معاك
لاقدرت القي وفاك
ولا قادر انسي هواك
--------------------------------------------------------------------------------
حنبنيهو / محجوب شريف
حنبنيهو..
البنحلم بيهو يوماتى
وطن شامخ
وطن عاتى
وطن خيّر ديمقراطى
وطن مالك زمام أمرو
ومتوهج لهب جمرو
وطن غالى
نجومو تلالى فى العالى
إراده
سياده
حريّه
مكان الفرد تتقدم..
قيادتنا الجماعيّه
مكان السجنِ مستشفى
مكان المنفى كليّه
مكان الأسري..
ورديّه
مكان الحسره أغنيّه
مكان الطلقه
عصفوره
تحلق حول نافوره
تمازج شُفّع الروضه
حنبنيهو
البنحلم بيهو يوماتى
وطن للسلم أجنحتو
ضدّ الحرب أسلحتو
عدد مافوق ما تحتو
مدد للأرض محتله
سند للإيدو ملويّه
حنبنيهو..
البنحلم بيهو يوماتى
وطن حدّادى مدّادى
ما بنبنيهو فرّادى
ولا بالضجه فى الرادى
ولا الخطب الحماسيّه
وطن بالفيهو نتساوى
نحلم..
نقرا
نتداوى
مساكن
كهربا ومويه..
تحتنا الظلمه تتهاوى
نختّ الفجرِ طاقيّه
وتطلع شمس مقهوره
بخط الشعب ممهوره
تخلي الدنيا مبهوره
إراده
وحده شعبيّه
--------------------------------------------------------------------------------
بنحب من بلدنا/أبو آمنة حامد
بنحب من بلدنا ما برا البلد
سودانية تهوى عاشق ود بلد
بعيون المفاتن شي ما ليهو حد
التوب المهبهب فوق أم الضفاير
والخد المعطر زي أحلى الأزاهر
والخطوة الأنيقة ترنيمة مشاعر
أنا بي كلو عمري بمشيلا وبسافر
مين في الدنيا دية أجمل من بناتنا
الليهن قلوبنا والفيهن صفاتنا
الكامنات في روحنا والعايشات في زاتنا
في حلفا البداية أحلامي وهنايا
أنا عايش لحبي المخضر برايا
النافرة الأليفة بجروحي وهنايا
أنا لي في كريمة شايقية بشلوخا
نعتز بصفاتا ما نجهل تاريخا
ماها المابية ريدتي ومو ياها المسيخة
في شندي العظيمة تلقى بنات جعل
وحدات في المتمة زي لون العسل
النايرات خدودن زي فجرا أطل
في سنكات بنعشق بت سمرة وأبية
ترتاح في الضريرة خصلاتا الغنية
عاشت في شعوري أحلى هدندوية
الواردات جدودن في الجود والشجاعة
البظهر جمالن من زمن الرضاعة
سودانية مية المية في زوقا وطباعة
يا ناس أرحموني أنا قلبي فرطاعة
لو تلقطنا اليانعة السمحة ونضيرة
تستنى الحليوة في مشية أميرة
أجمل حب عندي في قلب الجزيرة
لي في الغرب أغيد في دار حمر والبقارة
نحميها بسيوفنا تفاحنا ونضارة
تسكرنا الليالي وتطربنا النقارة
لي في جوبا الساحر تسلم لي خدودو
يمرح في غاباتو يسرح في ورودو
حبي الغالي ليهو ما بعرف حدودو
--------------------------------------------------------------------------------
بلد رايح/عمر الطيب الدوش
حأسأل عن بلد رايح
وافتش عن بلد سايح
واسأل عن امانينا
اللي ما بتدينا
صوت صايح
وأسأل وين مخابينا
إذا جانا الزمن...
لا فح
واسأل عن بلد مجروح
وعارف الجارحو ليه جارح
وابكى على بلد ممدوح
وعارف المادحو
ما مادح
واحلم بي حلم مسروق
لا هو الليلة
لا امبارح
أعلق في جناح سفري
خطابات لي زمن فجري
وادخل من درب سري
لكل مضاجع الأحزان
واضفِّر من شجر بلدي
بروقاً مارقة من صدري
حأسأل عن بلد غاطٍ
لحدِّ الليلهْ في الوجعة
أَنط فوق سرجي واتْحزَّم
أقوم من وقعة
لي وقعة
أخُتْ ايدي البتوجِعْني
على السأم البراجِعْني
واسأل..
يا وطن يا بيتنا
ليه شوقك مواجهني
ليه حبك مجهجهني
وليه تاريخ زمن خسران
موكّر لسَّه في شجني؟
حأكتب لي شجر مقطوع
مسادير
يمكن يتحرك
خطابات لي طفل مجدوع
يقوم
يجرى
يقع
يبرُك
رسالهة لكل قُمْريّة
إذا دم الشقا اتوزع
على كل البيوت
ما تْرِك
واسأل..
عن وطن رايِح
واديكم خبر جارح:
بأنو جميع جموع الناس
حيفضلوا لا كراع
لا راس
ونشترى في الدكاكين يوم
مسابح من دموع الناس
مساحيق من هموم الناس
زهج
يتْعَبّا في الأكياس
ونعلن في المزاد علنا
وترغي الجوقة والأجراس:
"!نبيع الطفلة والكراس"
واصرَخ
! ياوطن! يا بيتنا
ليه ما تبقى لينا الساس
قدر ما تجري فيك
أفكار...
يزيدوا الحبس والحراس
قدر ما تجري فيك الخيل
تدوس الهيبة
والإحساس
واسأل
يا وطن رايح
اذا كل القبور دخلت
بيوت الناس
بلا اسئذان
بلا صلوات
بلا أكفان
جريمة اسائل الدفَان؟
حريمة طلب تمن قبري
من البايع في أي مكان؟
واقولك يا وطن
رايح
واقولك يا وطن
آمر
سلام النفس ما كافر
ولا كافر
ولا كافر
--------------------------------------------------------------------------------
بلا وانجلى/محجوب شريف
بلا وانجلى
بلا وانجلى
حمد الله الف على السلامه
انهّ كتف المقصله
والسجن..
ترباسو انخلع
تحت انفجار الزلزله
والشعب..
بى أسرو اندلع
حرر مساجينو اندلع
قرّر ختام المهزله
يا شارعاً..
سوّا البدع
اذهلت أسماع الملا
كالبحر..
دواى الجلجه
فتحت شبابيكا المدن
للشمسِ
واتشابا الخلا
شفت البنادق فى السما
الظبط والربط انتمى
للشعب..
شعب الملحمه
الصرخه كانت همهمه
والهبه كانت ململه
سداً منيعاً يا وطن
يا شعب وهّاج الفطن
للظلم يوماً ما ركع
مهما جرى
تباً لعهد السمسره
والنهب..
ثمّ السمسره
سداً منيعاً يا وطن
صه يا طنين البلبله
أبدا ً لحكم الفرد..
لا
بالدم لحكم الفرد..
لا
تحيا الديمقراطيه
كم نفديك يا مستقبلا
بلا وانجلى
بلا وانجلى
حمد الله الف علي السلامه
انهدّ كتف المقصله
--------------------------------------------------------------------------------
الطير المهاجر /صلاح أحمد ابراهيم
غريب ..
وحيد في غربتو
حيران ..
يكفكف دمعتو
حزنان..
يغالب لوعتو
ويتمنى
بس لي أوبتو
طال بيه الحنين
فاض بيه الشجن
واقف يردد ..
من زمن
بالله ياالطير المهاجر للوطن
زمن الخريف
تطير باسراع
ماتضيع زمن
أوعك تقيف
وتواصل
الليلة
للصباح
تحت المطر
وسط الرياح
وكان تعب منك جناح
في السرعة زيد
في بلادنا ترتاح
ضل الدليب أريح سكن
فوت بلاد وسيب بلاد
وإن جيت بلاد
وتلقى فيها النيل
بيلمع في الظلام
زي سيف مجوهر
بالنجوم من غير نظام
تنزل هناك وتحيي
ياطير باحترام
وتقول سلام
وتعيد سلام
على ..
نيل بلادنا
وشباب بلادنا
ونخيل بلادنا
بالله يا طير
قبل ما تشرب
تمر على بيت صغير
من بابه ومن شباكه
بلمع الف نور
وتلقى الحبيبة بتشتغل
منديل حرير
لحبيب بعيد
تقيف لديها
وتبوس إيديها
وانقل إليها
وفاي ليها
وحبي الأكيد
------------------------------
السنبلاية/ محجوب شريف
لّما عرفتك اخترتك سعيد البال..
وختّ شبابى متيقن
عليك آمال
لا جيتك قبيله..
ولا رجيتك مال
ولا مسحور
ويوم ما كنت في عينىّ..
أجمل من بنات الحور
جيتك عاشق اتعّلم
من الأيام
ومن سأم الليالى البور
ومن أسر الوِلِف كتّال
لقيتك فى طشاشى دليل..
وفى حرّ الهجيره مقيل
ركزت على ضاكِ عصاى
لقيتك فى حياتى جذور
بنيّه اتلفّحت بالنور
مهجّنه من غنا الأطفال..
ومن سعف النخيل والنيل
ومن وهج الشمس موّال
وان اخترتينى إنساناً..
عزيزَ النفس بتمنّى..
وبسيط الحال
علىَّ حرَّمت زرعاً
ما سقيتو حلال
ومافصّد حصادو قفاى
وبينى وبينك الضحكه..
ورحيق الشاى
وطعم الخبز والسُتْره..
ومساء النور
وعمق الإلفه..
بين النهر
والنخله
وغنا الطمبور
وصدق العُشْره بين الأرضِ..
والإنسان
وبيني وبينك الفكره..
وجمال الذكرى
والنسيان
وحسن الظن
ومشوار الحيا اليوماتى
ما بين الجبل والسهل..
ما بين الصعب والسهل
عزّ الليل..
وفى سكّه مطر بكّاى
فلا هماً تشيلى براكْ
ولا جرحاً أعانى براى
ولانا على بعض نمتن
وتزعلى يوم..
وازعل
وننفعل مرات
تقبّلى منّى..
واتوسّد ضُراعى سكات
وفينا حنينه
تتشابك موده..
تشابك الغابات
ونحن اذا اختلفنا سوا..
بنطيع الصاح
ولو بتنا القوا بنرتاح
اذا تمن الملح والعيش..
رُضا الشمّات
وتتكى سنبلايه على ضراعى..
واميل
كأنى غنا الطفوله العذبْ
كأن الدنيا طى القلبِّ والمنديل
كأنّ الدنيا طىِّ القلب والمنديل
--------------------------------------------------------------------------------
الحنين يا فؤادي/اسماعيل حسن
انا عارفك يا فؤادي
طال عذابك وا سهادي
وا شقاي انا وا عذابي
لم تمر النسمة بالليل
من ديارم تشفي العليل
فيها قصة حبي النبيل
فيها ريدك وريدك جميل
يا نسايم احكي الغرام
ودي ليهم مني السلام
قولي ليهم طال الخصام
قل نومي وعز المنام
وين واشوفك وين يا ضنين
بس فراقك ليه بالسنين
لو عرفت حبيبك أمين
مابتخونو وتهجر حنيني
ياما بعدك شفت الألم
قل نومي وصبري انعدم
شفت دموعي وراك صارو دم
كل ما شدتو معاك انهدم
كلمة وحدة سقتني
--------------------------------------------------------------------------------
التجانى سعيد : من غير يعاد
من غير ميعاد
واللقيا أجمل في الحقيقة بلا اتظار
صحّيتي في نفسي الوجود
ورجّعتي لعيوني النهار
كل الطيوب الحلوة يا مولاتي والجيد الرقيق
واللفتة والخصل اللي نامت فوق تسابيح الغريق
وخطاك والهدب المكحل وفتنة التوب الأنيق
في لحظة مرت كالظلال تعبر رؤاي إحساس عميق
فتحتي جرح الليل عسى من صمتي ما قادر أطيق
صحّيتي في نفسي الوجود
ورجّعتي لعيوني النهار
لو مرة بعدك يا زمان الغربة تجمعنا الصدف
أنا كيف اعود من طيبة أول نظرة للدار منكسف
وا ضيعة الوتر اللي ما غنيت معاهو ولا عزف
من صدفة عابرة بلا سلام قلبي الغريق في الهم نزف
ياريتني ما شفتك ربيع ولا كان يلازمني الأسف
صحّيتي في نفسي الوجود
ورجّعتي لعيوني النهار
ضاع الكلام ماتت حروف اللقيا قبال اهمسا
والله ما غابت محاسنك لحظة لا الجرح اتنسى
للّيلة ما وشوش نسيم في روضو وما غرد مسا
للّيلة ما سافر عبير في الطيب يغازل نرجسة
للّيلة يا حبي الكبير في حرقة لافيني الأسى
صحّيتي في نفسي الوجود
ورجّعتي لعيوني النهار
--------------------------------------------------------------------------------
المرسال/محمد أبو قطاطي
مسكين البدا يأمل
أملو يغلبو تحقيقه
والعاشقة جفا المعشوق
الليلة وا سهرو ونشاف ريقو
امش قول ليهو ياالمرسال
عساه يراعي ملهوفو
حبيبك و بي وراك
جارت عليهو وخانتو ظروفو
فقد صبرو شرد نومو
لهيب الشوق خنق جوفو
نحول جسمو شحوب لونو
براك أحسن تعال شوفو
مسكين .. مسكين
براي السويتا في نفسي
قلبي الحب ما واعي
عشق زولا مجافيهو
وما كان للحصل داعي
اقول اتناسي حبو يزيد
تزيد بالتالي أوجاعي
طريق الحب مشيت فيهو
تعذر تاني ارجاعي
مسكين .. مسكين
خطاباتي البوديها
تقول لا بتمشي لا حاجة
وديت ليهو زول مرسال
والمرسال مشى وما جا
بقيت انا والنجوم بالليل
سوا نساهر ونتناجى
والناس اللي كانو سبب
رموني وبقو فراجة
مسكين .. مسكين
--------------------------------------------------------------------------------
الهوى الأول/الجيلي عبد المنعم
أخادع نفسي بي حبك وامنيها
واهرب حتى من ذكراك
والاقيها
دموع الحسرة في عينية اخفيها
نار الشوق اقول الصبر يطفيها
اقول انساك وانسى شقاي لو قادر
وطول الغربة والحرمان بلا آخر
اسيبك كيف وانت الناهي والآمر
وكيف اصبر وعارف نفسي ما صابر
شبابي معاك ما أضيع امانيه
وعمر هواك ما أقصر لياليه
رضيت بي ظلمو أحياه أقاسيه
ولو خلاني ما بقدر اخليه
تخاصم وتفتكر إحساسي اتبدل
وقايل قلبي مال لي سواك واتحول
وحاة ريدتنا وحياة الهوى الأول
بنرجع تاني لو زاد الجفا وطول
--------------------------------------------------------------------------------
القمر بوبا/ اسماعيل حسن
الصغيرة شجيرة الأراك
ياقمر عشرة الفي سماك
شاغلة روحي وقلبي المعاك
وين لقيتك لامن آباك
القمر بوبا عليك تقيل
العيون الما بدمعن
نامن أو صاحيات يبرقن
لا بصيدن لا بعشقن
سرهن في الجوف يحرقن
كشفن رموشن أو غمضن
كلو موت ماتقول برحمن
القمر بوبا عليك تقيل
الصغيرون الما كبير
الرقيبة قزازة عصير
السنون براقن يشين
العيون متل الفناجين
مابتحش قشة تناقير
مابتشيل جردل على الزير
الزراب فوقا تقول حرير
شتتي شبار يامضمير
خلي قلوب الصبيان تطير
انتي ريحتك دمور فرير
ولا بت السودان اصيل
القمر بوبا عليك تقيل
الجزير ام بحرا حما
فيك روحي وحبي النما
مابسيبا ان بقا في السما
ما بخلي الناس تظلما
روحي في دربك سالمة
يا غرق يا جيت حازمة
القمر بوبا عليك تقيل
القديما قديما الحمام
الوديزين في موجو عام
يا مرايقة قليلة كلام
وا حلاتا تقول السلام
القمر بوبا عليك تقيل
الغزال الفوق في السلم
المحبة تزيد الألم
كل يوم اصبح لي في هم
سيسبان عودك منظم
شمعدان نفسك يامختم
البرتكان نهدك مدردم
القمر بوبا عليك تقيل
الصغيرون ام الجنا
ياكريم ربي تسلما
تبعد الشر من حلتا
جنة للأم الولدتا
الفي جبل عرفات وضعتا
تسلم البطن الجابتا
دي ترباية حبوبتا
التميرة الفي سبيطتا
الصفار صابغ خضرتا
معزورة امها كان دستا
وا هلاكي النار شافتا
معزباني انا ود حلتا
القمر بوبا عليك تقيل
الدفيفيق الدابو ني
البسيمتو بتكويني كي
اهلو ضنو عليها وعلي
حبها النساني والدي
ما بخليك ان بقيت حي
يا قصيبة السكر الني
نهدك الما رضع جني
ووب على امك ووبين علي
القمر بوبا عليك تقيل
الديوان الديمة مقشوش
بالزهور والورد معروش
بالحرير الأصلي مفروش
ريحتو مايقوما بلا رتوش
كان دا وصفو ماهو مغشوش
قدروا الساكنينو في الحوش
القمر بوبا عليك تقيل
بحر الدمير العض ونزل
مرة يسقي الفل والنخل
فيهو عام وزينا وقدل
ياهنينة البيك عقلي انشغل
بعت روحي عشان ليك اصل
وانت ابعد لي من زحل
يا قمر بوبا عليك تقيل
المبارك شيخ الضهر
العليك ساسكت وفتر
قلي جنيت ولا دستر
واي أنا المرضان مكنتر
جابو لي حكيم خير وشر
قلي يا زول مرضك كتر
سببك كم شلاخا خضر
القمر بوبا عليك تقيل
--------------------------
أصبح الصبح/محمد الفيتوري
اصبح الصبح
ولا السجن ولا السجان باقي
واذا الفجر جناحان يرفان عليك
واذا الحزن الذي كحل تلك المآقي
والذي شد وثاقا لوثاق
والذي بعثرنا في كل وادي
فرحة نابعة من كل قلب يابلادي
أصبح الصبح
وها نحن مع النو التقينا
التقى جيل البطولات
بجيل التضحيات
التقى كل شهيد
قهر الظلم ومات
بشهيد لم يزل يبذر في الأرض
بذور الذكريات
أبدا ما هنت يا سوداننا يوما علينا
بالذي اصبح شمسا في يدينا
وغناء عاطرا تعدو به الريح
فتختال الهوينى
من كل قلب يا بلادي
فرحة نابعة من كل قلب يابلادي
--------------------------------------------------------------------------------
أسأل قلبك/ اسماعيل حسن
كدا اسأل قلبك عن حالي
أسألو
تنبيك عن سؤالك اشواقي
اسألو
كدا اسأل عيونك يا أجمل حبيب
واسأل لي خدودك براها بتجيب
في عيونك حياتي في حسنك بغيب
قلبي الحباك .. اسألو
ما حب سواك .. أسألو
ما عاش لولاك .. اسألو
طول عمرو فداك .. اسألو
تنبيك عن سؤالك .. اشواقي
أسألو
في حبك متيم والشوق ليك رسول
من قلبي بيطير ما بخشى العذول
وحولك يا حبيبي بيطوف ليك يزور
عن آمالي .. أسألو
عن أحلامي .. اسألو
عن آلامي .. اسألو
تنبيك عن سؤالك اشواقي
اسألو
أنا عايش عشانك يا أملي الوحيد
لو ما كان غرامك ما كان صابني ريد
ما فجرت لحني وما غنيت نشيد
أنا عابد جمالك ولي فنك بجيد
عنك وعني .. اسألو
طورك ولحني .. اسألو
حسنك وفني .. اسألو
تنبيك عن سؤالك أشواقي
أسألو
أنا ضقت السعادة وفارقني الندم
قبلك كنت تايه حياتي عدم
سلواي كان دموعي وسميري الألم
لكين اليوم ياحبيبي دنياي ابتسم
هل ربيعي .. اسألو
قدت شوعي .. اسألو
راحو دموعي .. اسألو
تنبيك عن سؤالك أشواقي
اسألو
--------------------------------------------------------------------------------
أرحل/التجاني سعيد
قلت أرحل ..
أسوق خطواتي من زولاً نسى الإلفة
أهون ليل
أساهر ليل
أتوه من مرفى لي مرفى
ابدل ريد بعد ريدك
عشان يمكن يكون اوفي
رحلت وجيت
في بعدك لقيت
كل الأرض منفى
عيونك زي سحاب الصيف تجافي بلاد وتسقي بلاد
وزي فرحاً يشيل مني الشقا ويزداد
وزي كلمات بتتأوّه.. تتوه لمن يجي الميعاد
وزي عيدا غشاني وفات عاد عمّ البلد أعياد
وزي فرح البعيد العاد
وزي وطناً وكت اشتاقلو برحل ليهو من غير زاد
بدون عينيك بصبح زول بدون ذكرى وبدون ميلاد
رحلت وجيت
في بعدك لقيت
كل الأرض منفى
زمان الفرقة والتجريح بسيبو عشان تشيلو الريح
بسيبو عشان صحيح الذكرى بتّوِّه عمرنا صحيح
وانتِ معاية لا بندم ولا بقضي العمر تبريح
أصلو العمر شوقا حزنا كان وصبرا كان فسيح وفسيح
أصلو العمر كان دربا مشيتو كسيح
وكان غرسا سقيتو بكى وقبضت الريح
رحلت وجيت
في بعدك لقيت
كل الأرض منفى
منــــــفـى
منــفـى
مـنفى
--------------------------------------------------------------------------------
أحبك أحبك / محجوب شريف
أحلى فصول العمر حنانك
حتة لقيتَ مكانك اجمل
أجمل سكة مشيتَ عيونك
أحبك أحبك أنا مجنونك
ساكن فيني هواك وبريدك
جوا القلب النبض يصونك
معاك معاني حياتي تبدا
وافتح باباً ياما انسدَّ
أشوف العالم ربوة جميلة
عليها نسيم الصبح مخدّة
وبيني وبين النهر عشانك
عشرة بتبدا
وبين عينية وخد الوردة
تبقى مودة
أصالح روحي
تبرا جروحي
ابشر باسمك اهلل أغني
أقيف اتحدى
أديتيني مشاعر حية
عوضتيني الزمن الماضي
زمن الجرح الأكبر مني
وقاسي علية
وبيك صادفني ولقى عنواني
رزاز الفرح الخلَّى الجية
أريت صادفني حنانك بدري
لو لاقيتك بدري شوية
------------------------------------
أكتوبر الأخضر/محمد المكي ابراهيم
اسمك الظافر ينمو في ضمير الشعب ايمانا وبشرا
وعلى الغابة والصحراء يلتف وشاحا
وبأيدينا توهجت ضياء وسلاحا
فتسلحنا بأكتوبر لن نرجع شبرا
سندق الصخر ..
حتى يخرج الصخر لنا زرعا وخضرا
ونرود المجد..
حتى يحفظ الدهر لنا إسما وذكرا
بسمك الأخضر يا أكتوبر الأرض تغني
الحقول اشتعلت قمحا ووعدا وتمني
والكنوز انفتحت في باطن الأرض تنادي
بسمك الشعب انتصر ..
حائط السجن انكسر..
والقيود انسدلت جدلة عرس في الأيادي
كان أكتوبر في أمتنا منذ الأزل
كان خلف الصبر والأحزان أحيا..
صامدا منتظرا حتى إذا الصبح أطل
أشعل التاريخ نارا واشتعل
كان أكتوبر في نفضتنا الأولى
مع المك النمر
كان أسياف العشر
ومع الماظ البطل
وبجنب القرشي
حين دعاه القرشي حتى انتصر
بسمك الأخضر يا أكتوبر الأرض تغني
الحقول اشتعلت قمحا ووعدا وتمني
والكنوز انفتحت في باطن الأرض تنادي
بسمك الشعب انتصر ..
حائط السجن انكسر..
والقيود انسدلت جدلة عرس في الأيادي
--------------------------------------------------------------------------------
مرحبا ياشوق/ الجيلي عبد المنعم
لم يكن إلا لقاء وافترقنا
كالفراشات على نار الهوى
جئنا إليها واحترقنا
كان طيفا وخيالا ورؤى
ثم ودعنا الأماني وأفقنا
بالذي اودع في عينيك
إالهاما وسحرا
والذي انزل فيك الحسنى
اشراقا وطهرا
لا تدعني للأسى
يدفعنى مدا وجزرا
أثقلت كفي الضراعات
وما تقبل عذرا
يا حبيبا بت أشكو حرقة الوجد اليه
وتوسلت ..
نذرت العمر قربانا لديه
ماله لو عاد
فالقلب رهين بيديه
وعيوني ظامئات للهوى من مقلتيه
يالقلبي ..
عاد من بعد النوى يطوي شراعا
آه بالهوى
يبعث في الروح حنينا واندفاعا
مرحبا يا شوق اغمرني شجونا والتياعا
فوداعا للذي شيدته بين ضلوعي فتداعى
--------------------------------------------------------------------------------
مافي داعي/ كجراي
مافي داعي تقولي مافي
يالربيع في عطرو دافي
لهفة الشوق
في سلامك
في كلامك
وسر غرامك ماهو خافِ
إرتعاشاتك بتحكي
قصة أحلامك معاي
وكل خفقة في قلبي نغمة
تحكي ليكي شوقي وهواي
إنت في بهجة شبابك
وحبي ليك من غير نهاية
مافي داعي ..
قلبي أخضر ولسة في ريعان شبابو
في حرارة شوقو بيسطر كتابو
شوفي كيف نشوانا بتتراقص حروفو
كل لحظة شوق بتتجدد ظروفو
مافي داعي ..
عشنا في دنيا الصبابة
والسعادة فتحنا بابها
بهجت الدنيا وشبابها
ابتساماتك حبابها
--------------------------------------------------------------------------------
هجرة عصافير الخريف/اسحاق الحلنقي
هـجرة عـصافير الـخريف
فـى مـوسم الـشوق الحلو
هـيج رحـيلا مـع الـغروب
احـساس غـلبنى اتـحملو
وكتمت اشواق الحنـيـن
داير الدموع يتـقـلـو
ورجعـت خليت الـدموع
يـنسابو ..مـنى ويـنزلو
ليـه يا عصافيـر الخريف
خضرة مـشاعـرى اشيلا صيف
تـحت الـغمام شـايف
مـواكب الـهجرة اتـلاشت سراع
ليه يـا عـصافير ليه الاسف
مين علمك أسف الوداع
وعارف دا ما اول سفر
لبلاد بـعيدة بـدون مـتاع
زى ما بتخافي مـن الرياح
بنخاف كمان انحن الضياع
ليه يا عصافير ليه الضنى
صفقة جناحك احزنها
غـايـب الـسنين الـليله
مالو غنا العصافير غـلبو
طراهو زولا كان ولوف
كم رضا خاطرو وطيبو
سمع قليبو كـلام حـنين
هـدهد مـشاعرو ودوبـو
الـناس سعيدم فى الـحياة
لا ضاق فراق لا جربو
وانا حالى فى بعد الوطن
دفـعنى ضي العين تمن
--------------------------------------------------------------------------------
لحظة من وسني/محمد الفيتوري
لو لحظة من وسني
عني حزني تغسل
تحملني
ترجعني
الى عيون وطني
يا وطني ..
يا وطني يا وطن الأحرار والصراع
الشمس في السماء كالشراع
تعانق الحقول والمراعي
واوجه العمال والزراع
يا وطني ..
أصبح الصبح كأن الزمن الماضي على الماء نقوش
فارفعي راية اكتوبر فالثورة مازالت تعيش
وانا مازلت في البعد انادي
يا بلادي
يا مغاني وطني ..
أجمل من فراشة مجنحة على ضفاف المقرن الجميل
أجمل من نوّارة مفتحة ترقد تحت ذهب الأصيل
أجمل من رائحة النضال لم أشم رائحة في صبحك الجليل
يا فخر هذا الجيل
يا وطني
--------------------------------------------------------------------------------
قسم بمحيك البدري/ابو صلاح
قسم بمحيك البدري
غرامك منو ضاق صدري
حبيبي البي العلي تدري
المحينون ليلة القدرِ
نصب فوق حاجبو لي غدرِ
معاك في داخل الخدرِ
فؤادي المالكو من بدري
حبيبي البي العلي تدري
حياتي ونعمتي ويسري
رضيت لو يرض بي اسري
فريض يا دموعي تنتثري
إذا منو النسيم يسري
حبيبي البي العلي تدري
حمام الأيك والقمري
يصيح ينبيك عن أمري
وبين عواسلك السمري
روايحي وفاكهتي وخمري
حبيبي البي العلي تدري
قبالك وين أجيل فكري
مصافحة اليمين سُكري
في بالك هل يمر ذكري
وامامك شكوتي وشكري
حبيبي البي العلي تدري
صحيح لجروحي لا تبري
هواك برضاي ما جبري
بسيمات فاهك التبري
ياجميل كم قللت صبري
حبيبي البي العلي تدري
-----------------------------
فرحة/ابو آمنة حامد
بين الريد والهوى ..عشنا ايامنا سوى
ما قاسينا النوى
ما أحلاك ياهوى ..الهم راح وانطوى
عش ريدتنا استوى
بين ايديه هنايا .. في عينيه منايا
حققنا أحلامنا
والعاشق عقبالو
بيني وبينو حكاية ..أصلو ماليها نهاية
وأحلام دنياية
لو شفتوهو معاية ..خطو الحالم آية
يروي محاسنو رواية
كم ضوت دنياية ..نور دربي براية
حققنا أحلامنا
والعاشق عقبالو
أنا بحبو اكتر ..ياما هواي بيكبر
ياما مشاعري بتسكر
حبو النامي الأخضر ..راعيناهو أزهر
في قلبينا ونوّر
والعذال كدناهم ..في لحظة نسيناهم
حققنا أحلامنا
والعاشق عقبالو
الأحباب شافونا ..بالأفراح لاقونا
هنونا وهنونا
حبيناهم حبونا ..غنو معانا وشاركونا
بالأحلام منونا
يا عشاق عقبالكم .. قولولنا هنيالكم
حققنا احلامنا
والعاشق عقبالو
قالو بتحبو
قتا ليهم مالو
ايدو علي ايدي الهنا مشينالو
حققنا أحلامنا
والعاشق عقبالو
--------------------------------------------------------------------------------
فتش في ترابك/المكاشفي محمد بخيت
فتش فى ترابك ..
قَلِبوُ ذرة ذره..
تلقانا بنحبك أكتر كل مرة
نحن أولاد كفاحك رغم وجودنا بره..
رغم الخطوة تاهت.. رغم الغربة مُرة
ننشد فى سبيلك عرفانا وجميلك ..
ونرحل فى هتافك يا عِشْقْ إستمرّ..
فتش فى ترابك ..
قَلِبوُ ذرة ذره..
بى عينيك نعاين عبر الضَلْمَة باكر
بكرة الجايى باين فى عودة مسافر
أمن قلبو عندك....طاف الريح مهاجر
أنفاسك تنومو لما الحزن جاسر
وأجراسك تقومو ..يصحى معاك يساهر
يصحى الحلم دايماً شعب ضراعو وافر ...
فى الأرض التزغرد فى أفق الحناجر...
والشمس البتطلع فى أعلى المنابر
وزى فى كل مرة أحلى وأغلى ثورة
يا وطن الأمانى وشعب إرادتو حرة...
فتش فى ترابك ..
قَلِبوُ ذرة ذره..
ياما الضفة تشهد يوم غنيت مكانا
يوم الغابة شافت فى عينيك زمانا
لما الكلمة تطلع منك برتكانه..
زيك نحن نعشق شرط تكون معانا
فى توب البنية وفى لمسات حنانا..
فى كل الأماكن وين ماتروح خطانا
هو العيد نشيدك 0..واللا الفجر عيدك
نحن الفى بعيدك أقرب من وريدك
فى ايدينا جمرة...
طول الوكت حرى ..
ياوطن الأمانى وشعبو إرادتو حرة..
فتش فى ترابك ..
قَلِبوُ ذرة ذره..
زرعو خصام جنوبنا ..بى سبب الديانة ..
الأديان سماحة وروح الدين أمانة..
طول تاريخنا عايشين فى السودان ضرانا
فينا لسانو عربى وفينا لسان رطانه..
مختلفين ثقافة ومختلفين ديانه
من كل التباين وحدنا إنتمانا
ومتفقين فى حبك يا عالى المكانة
--------------------------------------------------------------------------------
ياشعبا لهبك ثوريتك/محجوب شريف
على اجنحة الفجر ترفرف
فوق أعلامك
ومن بينات اكمامك
تطلع شمس أعراسك
يا شعباً لهبك ثوريتك
إنت تلقى مرادك والفى نيتك
وعمق احساسك بى حريتك
يبقى ملامح فى ذريتك
ماكَ هوين سهل قيادك
سّيد نفسك مين أسيادك؟
ديل أولادك
وديل أمجادك
ونيلك هيلك جري قدامك
تحت اقدامك
رجع صداك وسجع نحاسك
وانت نسيج الفدا هندامك
وانت نشيد الصبح كلامك
وعطر أنفاسك
أرفع صوتك هيبه وجبره
خلى نشيدك علي النبره
خلى جراح أولادك تبرا
كبروا مكان الضحكه العبره
إلاّ يقينهم فيك اتماسك
يا الإصرارك
سطراً سطراً مَلا كراسك
--------------------------------------------------------------------------------
ياأعز الناس/اسحاق الحلنقي
يا أعز الناس حبايبك نحن
زدنا قليل حنان
دا العمر زادت غلاوتو معاك
وصالحني الزمان
يا أحن الناس حنان
كنت من قبلك
بشيل الليل دموع
واطويه هم
انا كنت بخشى
على الأماني الطفلة
يفنيها العدم
وجيت لقيتك بين قلبي دموع
وغنيتك نغم
يا حبيب
ورد الأماني
الفي أعماقي فتح
وابتدا القلب
العاش العمر في آهاتو
يفرح
والزمن ماظنو بعدك انت
يرجع تاني يجرح
نامت أحزان عمري
غنى زماني
واتلاشت صعاب
أنا قبلك الأيام
قضيتا سراب
يسلمني السراب
وبيك طويت من عمري
صفحة ماضي مكتوب بالعذاب
-----------------------------------
يا شعبا تسامى/محجوب شريف
يا شعبا تسامي
ياهذا الهمام
تفج الدنيا ياما
وتطلع من زحاما
زي بدر التمام
تدي النخله طولها
والغابات طبولها
والايام فصولها
والبذره الغمام
قدرك عالي قدرك
ياسامي المقام
ياملهم رماحك
سناهاالصدام
ام در والطوابي
في صدرك وسام
ملامح كم
تسامح
تغضب لا تلام
همه وعبقريه
ذمه وفنجريه
ضد العنصريه
وتحلم السلام
فداك وفي حواك
يامدد الكلام عفوك
انت ورضاك
وبرنا ليك تام
وبحلم بهواك بي حسن الختام
دينك كم علينا
منك والدينا
واجمل مالدينا
من يوم السمايه
من قبل الفطام
منك كل حته
في الخاطر
صبابه
جنبك نبته نبته
نكبر نحن ياما
نسألك انت
وانت ورينا الاجابه
علمنا الرمايه
والحجا والقرايه
والمشي بي مهابه
في الضحي والظلام
--------------------------------------------------------------------------------
جيل العطاء/محمد المكي ابراهيم
من غيرنا يعطي لهذا الشعب
معنى أن يعيش وينتصر
من غيرنا ليغير التاريخ
والقيم الجديدة والسير
من غيرنا لصياغة الدنيا
وتركيب الحياة القادمة
جيل العطاء المستجيش
ضراوة ومقاومة
المستميت على المبادىء مؤمنا
المشرئب إلى النجوم لينتقي
صدر السماء لشعبنا
جيلي أنا..
هدم المحالات العتيقة
وانقضي سيف الوثوق مطاعنا
ومشى لباحات الخلود
عيونه مفتوحة
وصدوره مكشوفة
بجراحها متزينة
متخيرا وعر الدروب وسائرا
فوق الرصاص منافحا
جيل العطاء لك البطولات الكبيرة
والجراح الصادحة
ولك الحضور هنا
بقلب العصر فوق طلوله المتناوحة
ولك التفرد فوق صهوات الخيول روامحا
جيلي أنا ..
جيل العطاء لعزمنا
حتما يذل المستحيل وننتصر
وسنبدع الدنيا الجديدة وفق ما نهوى
ونحمل عبء أن نبني الحياة
ونبتكر
--------------------------------------------------------------------------------
عرس السودان/محمد الفيتوري
في زمن الغربة والإرتحال تأخذني منك وتعدو الظلال
وانت عشقي حيث لا عشق يا سودان إلا النسور الجبال
يا شرفة التاريخ
يا راية منسوجة
من شموخ النساء وكبرياء الرجال
لمن ترى أعزف أغنيتي ساعة لا مقياس إلا الكمال
إن لم تكن انت الكمال الذي يملأ كأسي ويفيض الجمال
يا شرفة التاريخ
يا راية منسوجة
من شموخ النساء وكبرياء الرجال
فداً لعينيك الدماء التي خطت على الأرض سطور النضال
داست على جلادها وهي في سجونه واس
الخميس أبريل 18, 2013 7:37 am