تصور كيف يكون الحال لو ماكنت سودانى
بلد مغموسة فى ظلم الظروف القاسية
شوف اهلى تمش وسط الخلوق فى السوق
جيوبهم فاضية ديل اهلى
والاسعار تقول النار
والدكان سمح مليان
والتاجر سمين مرتاح
من الكيزان
تقيف وسط الرفوف حيران
ما تعرف تشيل الزيت ولا السكر
ولاالصابون وكلو مهم
وما عندك غير
تشيلو وقية وقية فى صرة
وتفوت خجلان
او تسب للسوق
وتجر ازيالك المهرودة
وتفوت زعلان
تشكى لمين الحال
عشم جارك خلاص روح
هو زاتو اكيد نام جيعان
تصور كيف يكون الحال لو ما كنت سودانى
اخوك الكان اخو الضيفان
قفل بابو
وصبح جغلان
كان دقيت يقول مافيش
كان لاقاك يكون
زهجان
يخاف مرق القروش
من جيبو
كأنو ما كان
فى يوم فلسان
هو زاتو متين
صبح غنيان
وبيتو زمان
كان راكوبة جوة الحوش
واوضة وحيدة
مافى ديوان
من وين بقيت غنيان
ابوك زولا بسيط تعبان
لا وارث
ولاشغال
ولا قارى
موظف بس
مها صرفت ما فايت اكل عيشك
بتصرف كم؟
بيوت وقصور
وما خجلان
يوم الحق تقبل وين
من ربك
وتقول لى برضو سودانى
والسودان امانة كبيرة
فى اعناقنا
فى قلوبنا
تصور كيف صبح الحال
رشاوى كبيرة
محسوبية
فساد ذى سوسة
ينخر فى عظام بلدى
ولو ما كت
من العنزان
امورك واقفة
بى تلفون
بين فلان وفلان
تصور كيف يكون الحال
لو القاضى ما بحكم
بضمير صحيان
ولوباعك محامى
لخصمك بابخس الاثمان
لو الدكتور بليد سعران
بفهم فى القروش اكتر
ولو ما بتدفع اكيد بتموت
وفى التأمين مافى ضمان
والطالب بسف سكران
والبنوت بدون وليان
والصبيان كريم ومسوح
ومغتربين ومغتربات
سمعة بزيئة
بقيت اخجل
انى من ناس ديلا
وا اسفاى وا زلى
تبيع شرفك تبيع اسمك
والسودان
خريطة قبيحة مقطوعة
وما فى جنوب
وبكرة تشوف
يبعوا ارضنا
ويبيعونا
ويهربو ا يطشوا فى البلدان
اخير يا زول تصحى تقوم
قبل ما الفاس تشق الراس
وباقى دماء جدودنا الحارة
تتحرك ما تبقى جبان
ورجع للقلوب امالها
احمى سودان
زمان
ما كنت الفارس المغوار
وكان بيناتنا مافى جبان
قوم نفض غبار الذل
واستأصل للسرطان
وما تيأس وراك رحمن
عشان ارجع واقبف وسط الخلوق
وارفع راسى واتبجح واقول للدنيا ديل اهلي
الإثنين مارس 25, 2013 11:56 pm